🌹حكايات عمارتنا 🌹
🌹حكاية ساره 🌹الجزء الخامس والسادس 🌹
🤨 افندم حضرتك عايزاني أنا "/أيوه يابنتي عايزاكي تقعدي معانا تنورينا 🙂"/متشكره قوي ياطنط النور نورك*بس ممكن حضرتك تسيبي دراعي عشان فيه راجل محترم قاعد معاكم وهو اللي يقولي اعمل ايه أقعد ولا أمشي"/معلش ياساره ده من عشمي بس وعشان إنتي دخلتي قلبي من أول ماشفتك وكنت عايزه أكحل عنيه بوجودك معانا "/ربنا يخليكي يا طنط"وتركتهم ساره وغادرت الغرفة دون انتظار رأي أباها الذي أدرك بعلمه بسلوك أبنته أنها لا ترغب في هذا العريس ثم استأنف الحديث قائلا: أيوه يااستاذ رفيق مش رفيق برضه 😏مقلتليش هو إنت بتشتغل إيه ؟!"/أيوه ياعمي أنا بشتغل مدرس رياضيات"/آه مدرس دي حاجه حلوه قوي* وياترى بتدرس لانهي سنه وفين مدرستك ؟!"/أنا مدرس ثانوي وبدرس للولاد في مدرسة السعيدية الثانويه اللي قدام جنينة الحيوانات"/آه ماشاء الله ده شيء جميل*طيب وطبعا بتكسب كويس من الدروس الخصوصية يعني وكده يعني مش حسألك عن مرتبك"/آه الحمد لله خير ربنا كتير وفايض علينا بكرمه"/طيب عال قوي*طيب أكيد عندك شقة"/أيوه يعمي عندي ومتقفله مش ناقصه حاجه غير بس نجيب العفش ونفرشها وده طبعا سايبه لذوق العروسه"/طيب عال جدا إنت يابني تديني عنوان سكنك ومحل شغلك عشان إنت عارف إننا لازم نسأل عليكم زي ما أنتم أكيد سألتوا علينا مش كده برضه"/طبعا يا عمي حقك برضه وادي الكارت بتاعي أهو فيه عنواني وعنوان المدرسة وتليفوني عشان حضرتك تسأل براحتك"/ماشي يا بني اتفضلوا العصير قبل ما يسخن"/وبعد قليل غادر رفيق ووالدته ثم صاح عم فهمي على ساره فجاءت مسرعة وهي تقول: أيوه يا فهمي إنت بتنده على واحده مغمى عليها براحه شويه دي العماره كلها سمعت إنك عايزني ومش بعيد الاقي حد منهم دلوقتي نازل يسأل هو فيه ايه ابوكي بينده عليكي ليه 😂!"/يخرب بيت لماضتك يا لمضه اقعدي بقى وبلاش هزار عايز اعرف هو إنتي طبعا شفتي وعرفتي إن بسلامته ده كان جاي يتقدملك جاي طالب إيدك يعني"/أيوه طالب أيدي ازاي وبقية ساره حياخدها وقت تاني يعني ولا ايه هو إنت يا فهمي حتبيعني حتت ولا ايه 😄"/يابت بقولك بلاش هزار نتكلم جد شويه 😉"/جد إيه بس يابو ساره هي الوليه أمه دي خلت فيها جد هو إنت مشفتش مسكت أيدي ازاي وقال إيه عايزاني أقعد معاكم بالذمه دي أصول يعني أقعد ووريها وشي المقلوب ولا اعمل ايه 😀"/إحنا ملناش دعوه بأمه أنا بسألك عن رفيق ده ايه رايك فيه؟!"/رأيي إنت عارفه يابو ساره من غير مقولك ولا متبقاش ابويا اللي مربيني وعارف عني كل حاجه"/آه يعني مش موافقه صح"/ايوووه صح بص بقى يا فهمي فضها سيره بلا جواز بلا قرف وتعمل حسابك على كده أنا قاعده في ارابيزك على طول"/يا بنتي فكري ده الواد كويس ومش حتلاقي فرصه زيه"/لأ متخفش بينزل منه عروض في السوبر ماركت كل شهر فرصة ايه بس يا فهمي هو أنا رايحه اشتري قزازة زيت 😂"/يعني ده اخر كلام عندك😔"/أيوه أول وآخر كلام اغشك يعني ولا اضحك عليك وبعدين تعالى هنا هو إنت عايزني اتجوز واسيبك من غير منجوز البنتين الغلابه اللي جوه دول وبعدين نجوزك إنت كمان يابني واطمن عليكوا كلكوا وكده الواحد يموت وهو مرتاح أبقى أديت رسالتي وعملت اللي عليا 😂"/يابنتي حرام عليكي إنت كده حتخليني أنا اللي أموت من قهرتي عليكي😟"/قهرة إيه بس يا فهمي يابني من الاخر حفهمك حاجه أنا مليش في الجواز*هو أنا ناقصه واحد يقولي اعملي ده ومتعمليش ده خلص بقى يا حبيبي ومتزعلش يبوبا (بابا)"/وهكذا انتهى الحوار برفض ساره للعريس رفضاً تاماً بل والاكثر من ذلك رفضها لفكرة الزواج من الأساس وبعد فترة زمنية تجاوزت الستة أشهر جاء أباها من الخارج ووجدها وحيدة في الشقة واراد أن يتأكد فسألها:هما أخواتك هنا ولا فين يا ساره"/لأ يا فهمي محدش منهم هنا*بتسأل ليه!"/ابدأ كويس إنهم مش هنا عشان كنت عايز نتكلم لوحدنا "/طيب يابني متكلم هو أنا حايشاك"/أيوه يا حبيبتي أصل كنت عاوزك في موضوع مهم"/موضوع ومهم خير يا فهمي موضوع إيه؟!
بقولك ايه يا ساره بصي الموضوع ده فعلا مهم وميستحملش أي هزار فلو إنتي حتهزري مش حكمل كلامي معاكي خلاص "/موضوع إيه بابا إنت بتكلم جد فيه ايه وغوغشتني"/طيب طالما قلتي يابابا أنا حقولك: إنتي عارفه المرحومة أمك ماتت بقالها قد ايه دلوقت "/آه طبعا يابو ساره ييجي اكتر من تمن سنين لحد دلوقتي! ليه هه ؟"/شوفي يابنتي أنا مهما كان راجل برضه وليا احتياجاتي والحمد لله أهو اتنين من اخواتك اتجوزوا وكلها سنه ولا اتنين وأخواتك التانيين يتجوزوا صح كده "/ياعم فهمي أتكلم على طول عايز تقول إيه"/أنا عاوز اقولك يابنتي أنا قدامي كده يعني واحدة يعني وكده يعني "/إيه كل ده يعني ما تقول قدامك واحدة عاوز تتجوزها مش كده"/يخرب مخك يا بت عرفتيها ازاي دي 😀"/اديك إنت اللي بتهزر أهو يافهمي عموما هو أنا في ديك الساعه اللي تتجوز فيها بس تعالى هنا!هو أنت حتجيبلي ضره هنا ولا ايه 😉 '/لأ ياروح ابوكي حجيبلك مرات إبن مش أنا بقيت إبنك برضه 😄"/ماشي يا فهمي! وظروفها إيه البنوته اللي قبلت بيك وناوي ترازينا بيها 😀"/ابدا دي ارمله ومفيش معاها عيال يعني وحدانيه بطولها وعندها حاجه كده زي أربعين سنة أو أكبر شويه "/آه تمام واسمها إيه بقى الاموره بتاعتك دي"/إسمها ناهد وبعدين هو المهم إسمها ولا أخلاقها وطباعها إيه "/يابني أخلاقها وطباعها دي تهمك إنت إنما أنا كنت عايزه إسمها عشان أبلغ عنها البوليس!قولتلي إسمها إيه إيه الغندوره ناهد إيه ؟😄"/آه وحتبلغي تقولي إيه يافالحه 😉"/حقول واحدة جت خطفت أبني مني وضحكت على قلبه وخدته مني 😀"/يابت اتكلمي جد شويه بقى قولتي إيه في اللي بقولهولك ده "/هو أنا في ديك الساعه أما أشوفك عريس ده اليوم اللي بتحلم بيه أي أم أما تشوف ابنها عريس صحيح بتطلع عين اللي حتجوزه بعد كده لكن بجد بتبقى فرحانه عشان فيه واحده تانيه حتشيل عنها هم ابنها 😀"/برضه بتهرجي ومقلتيش رأيك إيه"/رأيي يابو ساره إنك فعلا صبرت كتير ومن حقك يابابا تجوز وإذا كان على اخواتي متشيلش هم أنا حعرف اكلمهم واتفاهم معاهم "/ربنا يبارك فيكي ياساره يابنتي أنا عارف إنك عاقله واعقل أخواتك ولولا هزارك الرخم معايا كنت قلت أعقل واحدة في الدنيا"/آه ماهو إنت لازم تختمها كده نكد! أنا رخمه!طب اتفضل شوف بقى مين اللي حيساعدك تقول لبناتك على المصيبه اللي حتجيبها دي 😀"/يادي النيله هو إنتي يابت متعرفيش تكملي حاجه أبدا من غير هزار ها قلتي إيه"/قلت لا إله إلا الله "مبروك يافهمي يابني وناوي على إمتى إن شاء الله 😀"/الأسبوع الجاي إن شاء الله "/الله ده إنت جاهز أهو ومخلص كل حاجه وعامل نفسك بتاخد رأيي وأنت مظبط كل حاجه من ورايا! ماشي يافهمي مش حنسالك الحكايه دي! عموما الف مبروك يا حاج وعقبال البكاري 😀"/يباركلي فيكي وفي عمرك يا حبيبة بابا ده اللي كنت منتظره منك ومخابش ظني فيكي الحمد لله"/*وبالفعل تمت الزيجة ومر كل شيء بسلام بمعاونة سارة التي قامت بإقناع إخوتها بضرورة زواج اباهن ومرت الأيام بين شد وجذب بين ساره وبين ناهد التي أرادت أن تتولى مقاليد الأمور داخل المنزل بصفتها سيدة البيت زوجة الأب التي يجب أن ينصاع لها الجميع بالسمع والطاعة وأن كلمتها يجب أن تكون هي العليا وبالرغم من محاولات ساره المضنية لجعل الأمور تمضي في وئام بينهما إلا إن ناهد دائما كان لها رأي آخر وكان عم فهمي يتدخل أحيانا لفض المنازعات بينهما واحيانا يغض الطرف عن التدخل خاصة من بعد ما ساءت حالته الصحية وبعد حوالي عام ونصف من هذا الزواج حدثت المفاجأة التي لم تكن في الحسبان*نهاية الجزء وغدا جزء جديد 🌹
🌹 السفير دكتور مجدى محمد أحمد 🌹 الشيخ مجدي 🌹
🌹🌹13 🌹12 🌹2023 🌹🌹
ليست هناك تعليقات:
إرسال تعليق