زمن الأجداد
**********
بقلمي/ السيد عطاالله
حنيت يا جدي لزمانك
شيلني وديني مكانك
الله يرحم بركة أيامك
زمن الأجداد الطيبين
شيلني وديني السوق
نشتري لنا شوية ذوق
الأخلاق ترفعنا لفوق
أنا كلي شوق و حنين
وديني لزمن الشهامة
ما فيه أفكار هدامة
زمن الطيبة فيه علامة
بترجاك بدموع العين
أشتري شوية ضمير
أوزن كمان شوية خير
اسقيني من قلة و زير
فطير واحشني سنين
وديني مش ها أندم
بظل الأشجار أتنعم
ستي تضحك تتبسم
الله يرحمهم الميتين
سقف البيوت من القش
الحب متين مش هش
ناس تحمده لو ع المش
بيوتهم كانت من الطين
بيوتهم بالسعادة مليانة
إيمانهم كان كله متانة
الجار كان سند و إعانة
على الأصل محافظين
بيوت فيها اللبن و البيض
طلمبة ميه قدامها حوض
زمان رغم وجود البعوض
على لمبة الجاز متفوقين
كلمات السيد عطاالله ٠
ليست هناك تعليقات:
إرسال تعليق