سكــــر
ــــــــــٰـ
ذا حلم ليلة ولا في الحلم من مُنكَر
والحلم مااظن له رادع ولا ناهي
احلامنا لا تشاورنا ولاتنذر
مثل الحقايق تجي او مثل الاشباهي
احلام ماتنطري واحلام ماتذكر
وحلمٍ كما السكر اللي فـ اخر الشاهي
حلمٍ يخليك تتخيّل وتتذكر
تبني قصايد خيال بـ ذوق متناهي
كأنّ عذرا جميلة زينة المظهر
جمالها سحر للعشاق توّاهي
جتني على هونها تمشي وتتمخطر
والوجه مثل القمر في طلته زاهي
والخال في الخد كنه نقطة العنبر
واحترت ماكنّ عيني شافت الّا هي
وقفت مبهور انا في وصفها المبهِر
محتار واصبحت انا عن وجهتي ساهي
قامت تناظر بعينٍ طرفها يسحر
وانا مجمّد وصرت عن المشي واهي
لو ناظرت في يهودي بعد يتنصّر
يسلم ويرمي الصليب وينقلب فاهي
قالت وهي تبتسم وش فيك ياسكر
وش فيك واقف قبالي سارح ولاهي
من بعد هذي العبارة قمت انا اتشطر
وقلت سكر لكن ما اذوب في الشاهي
قالت عسى سكرك في الجو يتبخر
وش فيك اشوفك بنفسك صرت متباهي
وقلت يابنت ما من طبعيَ اتكبر
لكن دها القلب من طاري الهوى داهي
سكر انا في القلوب اذوب واتكرر
في مثل قلبك وطلّةْ وجهك الباهي
لا ذبت في قلب صافي صعب يتعكر
وانا لقلبك خذيني وارحمي آهي
قالت وهي للرضا تِبدي وتتنكّر
كم ذبت ياسكرةْ قلبي مع اشباهي؟
وقلت والله ماني بالقسم مجبر
انتي اول المالكات وقلبك الطاهي
ردت بصوت الخجل ياسكري تشكر
سلمتك القلب وانت الآمر الناهي
وتبسمت لي وهلل قلبي وكبّر
وارتاح قلبي المعنّا وانقبل جاهي
فزّيت من نومتي والبال متكدر
نبضي بقلبي يموج ويبست اشفاهي
واعوذ بالله من ذا الحلم واستغفر
ان كان قلبي عن اذكار المسا تاهِ ي
ياحلم باب الغزل مقفول ومسكر
عندي ولا بقبله برضاي واكراهي
شف غيري احسن .معي لاعاد تتكرر
تقلق منامي وتتعب قلبي الراهي
اضغاث الاحلام ماتفهم وتتْعبّر
ولا تناقل على الالسن والافواهي
#مستورمحمدالحارثي
ليست هناك تعليقات:
إرسال تعليق